News

कुवेतबाट ३ सय नेपाली महिला बुधबार स्वदेश फर्कने

काठमाडौं, जेठ २७ / कुवेतबाट बुधबार आममाफीमा सहभागी ३ सय महिला स्वदेश फर्कने निश्चित भएको छ । बुधबार दुई वटा जहाजमार्फत कुवेत सरकारले नै आममाफीमा सहभागी भएका महिलालाई नेपाल पठाइदिने भएको हो । फर्कने तीन सय जनाको सूची कोभिड १९ क्राइसिस म्यानेजमेण्ट कमिटी (सीसीएमसी)ले तय गरिसकेको छ ।

आममाफीमा सहभागी भएका र घरफिर्ती केन्द्रमा रहेका केही गरी २ हजार ९९१ जनाको सूची दूतावासले परराष्ट्रलाई बुझाएको र उनीहरुमध्ये ३ सय जनालाई दुई वटा उडानमार्फत कुवेत सरकारले नेपालसम्म पुर्‍याइदिने कुवेतका लागि नेपाली राजदूत दुर्गाप्रसाद भण्डारीले जानकारी दिनुभयो ।

‘यहाँबाट लैजान समस्या छैन, नेपालमा कतिवटा जहाज ल्याण्ड गर्न दिनुहुन्छ भन्ने उताको कुरा भयो’ राजदूत भण्डारीले भन्नुभयो, ‘यहाँबाट पठाउन हामी तयार छौं, कतिबजे र कतिजना लिएर जहाज जाने भन्ने जानकारी चाहिँ नेपालबाट आएको छैन ।’

कुवेतबाट जजिरा एअरवेजले नेपालीहरुलाई लिएर आउने छ । तर समय भने टुङ्गो लाग्न बाँकी छ । कुवेत सरकारले भिसाको अवधि सकिएका र रोजगारदाता परिवर्तन गरेर काम गर्दा कागजातबिहीन भएका विदेशी नागरिकलाई आममाफीमा सहभागी गराएर आफ्नै जहाजमार्फत नेपाल ल्याइदिन लागेको हो ।

नेपाल सरकारको मापदण्डअनुसार कुवेतले नेपाल फर्कनेहरुको कोरोना जाँच पनि आफैंले गरिदिने छ । गएको अप्रिल २६ देखि ३० सम्म कुवेतले दिएको चार दिनको आममाफीको समयमा झण्डै तीन हजार नेपाली सहभागी भएका छन् । उनीहरु कुवेत सरकारले नै निर्माण गरेको सेल्टरमा बसिरहेका छन् ।

कुवेतले नै खाद्यान्न लगायतको व्यवस्था गरिरहेको छ । नेपालले अनुमति दिएमा कुवेत यसअघि नै पनि आममाफीमा सहभागीलाई ल्याइदिन तयार थियो । यस्तै अस्ट्रेलियामा समस्यमा परेका ११ नेपाली पनि बुधबार नै नेपाल फर्कने भएका छन् । यूएईबाट भने आउने, नआउने टुंगो लागिसकेको छैन ।

उज्यालो अनलाइन बाट

Related Articles

Back to top button
Close